ပစ္စုပ္ပန်ကိုရှာမတွေ့နိုင်ကြသူများ (မြင့်သန်း)

You must live in present, launch yourself on every wave, find your eternity in each moment.

Henry David Thoreau

တစ်နေ့တော့ ဟိုအကောင်က ဖုန်းဆက်တယ်။ အတော်ပဲ အံ့အားသင့်သွားမိတယ်။ ကျွန်တော့်ဆီ ရန်ကုန်ကနေ ဖုန်းဆက်တဲ့လူ ရှားတယ်။ ကျွန်တော့်ယောက်ဖတစ်ယောက်ကတော့ သူ့အစ်မဆီ ဆက်လေ့ရှိတယ်။ ငြိမ်းမောင်တစ်ယောက်ပဲ နည်းနည်းထွေပြီး အိပ်မရရင် ဆက်တတ်တယ်။ ဒါကလည်း ကျွန်တော်ချဲထားလို့။ တစ်ခါက စားရင်းသောက်ရင်း ကျွန်တော်လည်း စိတ်ကူးပေါက်ပေါက်နဲ့ ချဲပစ်လိုက်ဖူးတယ်။ တတိယကမ္ဘာကလူတွေမှာ အက်တိကက်ဆိုတာမရှိဘူး။ ပရိုတိုကော်(လ) ဆိုတာ နားမလည်ဘူးလို့ ငါ ဖတ်ရဖူးတယ်။ ဆယ်ခါ ဖုန်းဆက်လို့မှ တစ်ခါပြန်ပြီး ဖုန်းဆက်ရမှန်း မသိတဲ့အကောင်တွေ။ အီးမေး(လ်)ပို့လို့မှ ပြန်ရမှန်းမသိတဲ့ အကောင်တွေ။ မင်းတို့နဲ့ ကျောက်ဖြစ်ရုပ်ကြွင်းတွေနဲ့ ဘာကွာလို့လဲလို့ ပြောရင်း ချဲလိုက်မိတယ်။ အဲဒီကတည်းက ငြိမ်းမောင် တစ်ယောက်က မူးလာရင် ဖုန်းဆက်တယ်။ သူဆက်တာ ည ဆယ်နာရီလောက်ဆိုတော့ ကျွန်တော့်ဆီမှာ သန်းခေါင်ကျော်နေပြီ။ မင်းဆွေကတော့ အီးမေး(လ)ပြန်ဖို့ ငှားထားတဲ့ ကောင်မလေးလာတဲ့အခါ အီးမေး(လ)ပြန်ပို့တယ်။ စာကတော့ တစ်ကြောင်း၊  နှစ်ကြောင်းပဲ။ သူ့အီးမေး(လ)ဖတ်ရတိုင်း သူပြောချင်တာနဲ့ ကောင်မလေးရေးတာနဲ့ တစ်ခြားစီလို ဖြစ်နေတာတော့ ရိပ်မိတယ်။


ဘော်နီ မင်္ဂလာဆောင်တော့မယ်လို့ သူက ပြောတယ်။ မင့်သား ဘော်နီလားလို့ ကျွန်တော်ကမေးတော့ သူက အေလို့ ဖြေတယ်။ ကောင်းသားပဲလို့ ကျွန်တော်က ပြောတော့ သူက အေလို့ပဲဖြေပြီး အတော်ကလေးကြာအောင် ငြိမ်နေတယ်။ ပြီးမှ မင်းတို့ လင်မယား လာစေချင်တယ်ကွာလို့ ပြောတယ်။ ကျွန်တော်က တို့ ကြိုးစားမယ်လို့ပြောပြီး ဘော်နီဟာ ငါ့သားလိုပဲ။ ငါ လာနိုင်အောင် ကြိုးစားမယ်လို့ ပြောလိုက်တော့ တယ်လီဖုန်းထဲမှာ သူ့ရယ်သံ ကြားရတယ်။ ဘာရယ်တာလဲလို့မေးတော့ မင့်သားဆိုရင်တော့ ကောင်းတာပေါ့ကွာလို့ သူက ပြောတယ်။ သူ ဘာကို ဆိုလိုမှန်း ကျွန်တော်သဘော မပေါက်ဘူး။ ဒါပေတဲ့ ဘာမှ ထပ်မမေးတော့ဘဲ တစ်ခြားအကြောင်းတွေပြောပြီး တယ်လီဖုန်းမချခင် မင်းဆီ ငါဖုန်းဆက်တယ်နော်။ ဒါဆို မင်းပြောပြောနေတဲ့ ပို့(စ)မော်ဒန်လောကကြီးရဲ့ ယဉ်ကျေးတဲ့ လူ့အဖွဲ့အစည်းကြီးထဲ ဝင်လို့ရပြီလားလို့ ရိလိုက်တယ်။ မြို့ကြီးပြကြီးသားတွေဟာ အသံကျယ်ကျယ်နဲ့ စကားမပြောကြဘူး။ ဝိုင် ကောင်းကောင်းသောက်တတ်တယ်။ ဝီစကီကို သူ့ဖန်ခွက်နဲ့မှ သူ သောက်တယ်။ မိန်းမတစ်ယောက်ကို တန်ဖိုးတစ်ခုအနေနဲ့ တန်ဖိုးထားတယ်။ ကာမဂုဏ်ခံစားဖို့သက်သက်ရယ်လို့ မမြင်ဘူး။ မကြည့်ဘူး။ ပြောရရင် အများကြီးပဲ။ ဒီတော့ မင်းတို့မှာ လိုနေတာတွေ အများကြီးရှိနေသေးတယ်လို့ ကျွန်တော်က ထပ်ပြီးပြောရင်း နောက်လိုက်မိတယ်။ သူက ကျွန်တော်ပြောတာတွေကို မတုန့်ပြန်တော့ဘဲ လာနိုင်အောင်လုပ်ကွာ။ မင်းနဲ့ ငါ စကားပြောချင်တယ်လို့ ပြောတယ်။ ငြိမ်းမောင်တို့၊ မင်းဆွေတို့ သေကုန်ပြီလားလို့ ကျွန်တော်က မေးတော့ ငါပြောတာရှင်းရဲ့လား။ မင်းနဲ့ငါ စကားပြောချင်တယ်လို့ ငါပြောတာ။ ဟိုအကောင်တွေနဲ့ ပြောချင်တယ်လို့ ပြောတာမဟုတ်ဘူးလို့ သူက ပြန်ပြောတယ်။ သူ့လေထဲမှာ သြဇာပေးချင်တဲ့အသံ ပါလာတယ်။ ကျွန်တော်လည်း အေးကွာလို့ပဲ ပြောပြီး စကားစ သိမ်းလိုက်တယ်။

ဒီအကောင်က ငြိမ်းမောင်တို့ မင်းဆွေတို့လိုမဟုတ်ဘူး။ ငယ်ငယ်ကတည်းက သူ့စည်းသူ့ကမ်း၊ သူ့မူသူ့ဟန်နဲ့ နေတဲ့ကောင်မျိုး။ မေတ္တာတရားအခြေခံနဲ့ နေတဲ့ကောင်။ သည်းခံနိုင်တဲ့ကောင်မျိုးလို့ ပြောရမယ်။ ကျွန်တော်နဲ့ ငယ်ငယ်ကတည်းက ခင်တာ။ သူ့အဖေနဲ့ ကျွန်တော့်အဖေကလည်း ခင်တယ်။ အဖေ့ မျက်စိထဲမှာတော့ ဒီကောင်ဟာ သိပ်ပျော့တယ်လို့ မြင်တယ်။ သူ့အဖေကလည်း အဲဒီလိုပဲ မြင်တယ်။ ဒါကြောင့် ကျွန်တော်တို့ ငြိမ်းမောင်တို့နဲ့ ပိုပြီး ပေါင်းစေချင်တယ်။ ငယ်ငယ်ကဆို ငြိမ်းမောင်နဲ့ ကျွန်တော်က ဂျူးဂျစ်ဆု သင်တယ်။ ကင်ဒို ကစားတယ်။ လက်ဝှေ့တောင် သွားထိုးကြသေးတယ်။ ကျွန်တော်တို့က တစ်ကောင်ကောင်ကို ကြည့်မရလို့ ဆွဲထိုးရအောင်ဆိုရင် သူက ဝင်ပြီးတားလေ့ရှိတယ်။ သူကတော့ ကောင်မလေးတွေနဲ့ ပိုလုံးတယ်။ အနွံအတာခံတာ များတော့လည်း ကောင်မလေးတွေက သူ့ကို သဘောကျတယ်လို့ ပြောရမှာပဲ။ ကောလိပ်ရောက်တော့ ကျွန်တော်တို့အားလုံး အခြေအနေတွေ ပြောင်းသွားကြတယ်။ အတူသွားအတူလာ လုပ်နေကြတုန်း ဆိုပေတဲ့ ကိုယ့်ဦးတည်ရာကို ကိုယ့်ဘာသာရှာကြတယ်။ ဒီကောင်ကတော့ လုံးလုံးချည်းပြောင်းသွားတယ်။ ပြောင်းဆို ကောလိပ်ရောက်စနှစ်မှာပဲ ကောင်မလေး တစ်ယောက်နဲ့ယူတယ်။ ယူ“ရ”တယ်လို့ ပြောရင် ပိုထိရောက်မယ်ထင်တယ်။ ယူရတယ်ဆိုတာက မယူမဖြစ်တော့လို့ဘဲ။ ကျွန်တော်တို့ထဲမှာ ကျွန်တော်က သူနဲ့အရင်းနှီးဆုံးမို့ သူ့ကိုကြိတ်ပြီး မေးမိတယ်။ ဘယ်တုန်းက ဘယ်လိုဖြစ်ကြတာလဲ။ အဲဒီ ကောင်မလေးကလည်း သူနဲ့အဖွဲ့ကျတဲ့ ကောင်မလေးတွေအထဲက တစ်ယောက်။ ကျွန်တော်ကတော့ သူနဲ့ကြိုက်လို့ အတူသွားလာနေကြတယ်လို့ကို မထင်ဘူး။ အဲဒီတုန်းက မင်းဆွေနဲ့ ကျွန်တော်၊ အတော်ကလေး စကားများရသေးတယ်။ သူက ဒီကောင့်ကို ကုတ်ကမြင်းလို့ မြင်တယ်။ မင်းမသိပေတဲ့ ဒီကောင်က မိန်းကလေးအုပ်စုထဲမှာ လှည့်ပတ်နေမှာပါကွာလို့ ပြောတယ်။ ကျွန်တော်ကတော့ ဒီကောင် အဲဒီလောက်ထိ ပိုးစိုးပက်စက်နိုင်တဲ့အကောင်လို့ မထင်ဘူး။ ကောင်မလေး တစ်ယောက်ကို ဖက်နမ်းရဲတဲ့သတ္တိ မရှိဘူးထင်တယ်။ ကျွန်တော်မေးတော့လည်း ဒီကောင်က ဘာမျှမဖြေဘူး။ ကောင်မလေးက အရင် ကွန်ဗင့်ကျောင်းသူ။ မျက်နှာများတယ်။ နယ်က ပိုက်ဆံရှိသားသမီး၊ ပထမနှစ်မှာ ဒီကောင်နဲ့ယူတယ်ဆိုပြီးတော့ သူ့မြို့ကို ပြန်သွားတာ။ တစ်ခါမျှ ထပ်မတွေ့ရတော့ဘူး။ ရုံးတက်ပြီး တိုးတိုးတိတ်တိတ် လက်ထပ်လိုက်ကြတာပဲလို့ ပြောကြတယ်။ ဒီကောင်ကတော့ ကျောင်းပိတ်ရက်တွေမှာ အဲဒီကို လိုက်သွားလေ့ရှိတယ်။ နောက်တော့လည်း ဘာမျှမကြားရတော့ဘူး။ ဒီလိုနဲ့ပဲ ဒုတိယနှစ် လောက်ကတည်းက ဒီကောင်လည်း တစ်ခုလပ်လိုလို၊ မုဆိုးဖိုလိုလို၊ ကလေးတစ်ယောက်အဖေလိုလို ဖြစ်နေတယ်။ ပြောချင်ရင်တော့ သူ့ဘဝအတွက် အစွန်းအထင်းတစ်ခုဖြစ်သွားတယ်လို့ ပြောကြမှာပဲ။ ကျွန်တော်တို့ သူငယ်ချင်း အပေါင်းအသင်းတွေအကြားမှာတော့ အဲဒီလို မမြင်မိကြဘူး။ ဒီကောင်ကလည်း တခြားကောင်မလေးတွေနဲ့ကတော့ ရောနေသေးတုန်းပဲ။

ဆယ်တန်းမှာ ဒီကောင်က ကျွန်တော်တို့လို နှစ်ချင်းပေါက် မဟုတ်ဘူး။ တစ်နှစ်ထပ်နေရတယ်။ သူ့အပြစ်မဟုတ်ဘူး။ သီတင်းကျွတ်ကျောင်းပိတ်ရက်မှာ သူ့အမေနဲ့ ဘုရားဖူးလိုက်သွားရင်း ကားမှောက်တဲ့အထဲပါသွားလို့ တစ်လလောက် ဆေးရုံတက်လိုက်ရလို့ပဲ။ သူ့အမေကတော့ ဆုံးသွားတယ်။ သူကတော့ ကားထိုင်ခုံနဲ့ညပ်နေလို့ ခါးအောက်ပိုင်း အတော်ထိသွားတယ်လို့ သိရတယ်။ ဆေးရုံက ဆင်းကာစကတော့ ခါးတစ်ဖက်နဲ့နေသလိုပဲ။ နောက်တော့ လုံးလုံးပျောက်သွားပုံရတယ်။ သူက ကျန်းမာရေးလိုက်စားတော့ ကျွန်တော်တို့အထဲမှာ အတော့်ကို တောင့်တယ်လို့ပြောရမယ်။ တက္ကသိုလ်ကျောင်းသားဘဝမှာ အပြေးသမားအဖြစ် နာမည်ရလာတယ်။ ကျွန်တော်တို့ လူသိုက် ဘွဲ့ရတဲ့လူရ၊ မဟာဝိဇ္ဇာတို့၊ မဟာသိပ္ပံတို့ တက်တဲ့လူက တက်တဲ့အချိန်မှာ သူနဲ့ အမြဲလို မဆုံကြတော့ဘူး။ လူချင်းမတွေ့ကြပေတဲ့ တစ်ပတ်တစ်ကြိမ်လောက် ဖုန်းပြောဖြစ်ကြတယ်။ တစ်နေ့တော့ ကျွန်တော်တို့ကို တက္ကသိုလ်ရိပ်သာလမ်းထိပ်နားက ဟိုက်စွမ်မှာ ဘီယာတိုက်မယ်ဆိုပြီး ချိန်းတယ်။ အဲဒီမှ စားရင်းသောက်ရင်း သူကပြောတယ်။ ငါ အရာရှိသင်တန်းတက်ဖို့ လျှောက်ထားတာရပြီ။ အားလုံးပြီးပြီ။ နောက်အပတ်ထဲ သွားတော့မယ်။ မင်းတို့ကို နှုတ်ဆက်တာပဲလို့ ပြောတယ်။ ကျွန်တော်တို့အားလုံး အံ့အားသင့်ရတယ်။ ကျွန်တော်ကတော့ သိပ်မအံ့သြမိဘူး။ ဒီကောင်က ကြိတ်ပြီးလုပ်တတ်တဲ့ အကျင့်ရှိတယ်။ နှုတ်လုံတယ်။ ခုဟာလည်း သူ့ဘာသာ ကြိတ်လုပ်နေတာ ကြာပြီထင်တယ်။ သူ အရာရှိဖြစ်လို့ ရန်ကုန်ကို ပြန်ရောက်မှ ကျွန်တော်တို့တစ်တွေ ဟိုက်စွမ်မှာပဲ ပြန်ဆုံကြတယ်။ အဲဒီတုန်းက မင်းဆွေကတောင် နောက်သေးတယ်။ မင်းမှာ မင်းဘာသာကြိတ်ပြီးကြံစည် လုပ်ကိုင်နေတာတွေရှိရင် ခုကတည်းက ပြောထား။ မင်း ကြိတ်လုပ်ထားတာတွေ သိရတိုင်း တို့ အံ့သြရတာများပြီ။ သိပ် မအံ့သြချင်တော့ဘူးတဲ့။

ကျွန်တော်တို့တစ်သိုက်ထဲမှာ ငြိမ်းမောင်တစ်ယောက်ကလွဲလို့ မိန်းမရတဲ့ လူရ။ ရတဲ့မိန်းမနဲ့ ကွဲတဲ့လူကွဲ။ ကလေးရတဲ့လူရ။ အဲဒီလိုဖြစ်ချိန်မှာ ဒီကောင် မိန်းမရပြန်ရော။ ဒီတစ်ခါတော့ ပြောင်ပြောင်တင်းတင်းပဲ။ အင်းလျားလိတ်မှာ လက်ထပ်တာ။ လက်မထပ်ခင် တစ်ပတ်လောက်မှာမှ အိမ်ကိုပေါက်ချလာပြီး ဖိတ်စာပေးလာတယ်။ မင်းတို့ လင်မယားနှစ်ယောက်စလုံး လာဖြစ်အောင်လုပ်ကွာ။ တို့တွေအားလုံး ပြန်ဆုံကြရအောင်လို့ပြောတယ်။ အဲဒီတုန်းက ဖိတ်စာကိုဖွင့်ဖတ်ရင်း မင်းက ဘယ်လိုလုပ်ပြီး ဆရာဝန်မနဲ့ ညားရတာလဲလို့မေးတော့ သူဒဏ်ရာရပြီး ဆေးရုံကဆင်းတော့ ဆေးခန်းမှာ ဆေးသွားထည့်ရင်းက တွေ့ကြတာတဲ့။ သူ့ဘာသာ ဆရာဝန်မပဲ ရရ၊ ကောက်စိုက်သမပဲ ရရ၊ သူကြိုက်ရင်ပြီးတာပဲ မဟုတ်လား။ ဟိုတုန်းက မင်းကိစ္စကိုကော သူသိသလားလို့ သူ့ကိုကပ်ပြီး တိုးတိုးမေးလိုက်မိတယ်။ သူက ပါးစပ်ကပြန်မဖြေဘဲ ခေါင်းကို အသာခါပြတယ်။ သူပြန်သွားတော့ ကျွန်တော့်မိန်းမက ဖိတ်စာကို သေသေချာချာဖတ်ပြီး သူယူမယ့်မိန်းမက မက်သဒစ်က ထင်တယ်။ ဟို. . နာမည်ကြီး ညီအစ်မသုံးယောက်အထဲက တစ်ယောက်ဖြစ်လိမ့်မယ်လို့ ပြောတယ်။ ဘာတွေနာမည်ကြီးတာလဲလို့ ဆိုတော့ လှလည်းလှတယ်၊ ရှုပ်လည်း ရှုပ်တယ်လို့ ပြောတယ်။ ကျွန်တော်ကတော့ သူကြိုက်ရင်ပြီးတာပဲကွာလို့ပြောပြီး ဒီကိစ္စကို မဆက်တော့ဘူး။ နောက်နှစ်ရက်လောက်ကျတော့ ငြိမ်းမောင်တစ်ယောက် အိမ်ကို ရောက်လာပြီး အဲဒီအကြောင်းတွေ ပြောပါလေရော။ အဲဒီညီအစ်မသုံးယောက်ထဲက အခု ဟိုကောင်နဲ့ ယူမှာ အငယ်ဆုံးမလို့ပြောပြီး ဇာတ်စုံခင်းပြတယ်။ ငြိမ်းမောင်ကလည်း မက်သဒစ်မှာ နေဖူးတော့ အဲဒီကအကြောင်းတွေ အတော်စုံစုံသိသကိုး။ ကျွန်တော်ကတော့ သူ့ကိုပဲ နွှာရတယ်။ သူ့ဘာသာ ဘယ်လောက်ရှုပ်ရှုပ်၊ ဆရာဝန်တော့ ဖြစ်သေးတယ်။ မင်းတို့ကောင်တွေ၊ သူတော်ကောင်းတွေလိုလို၊ လူတော်တွေလိုလို နေပေတဲ့ ဘာမျှဖြစ်မလာဘူး။ ဒီတော့ ဒီကောင်မလေးက မင်းတို့ထက်တော့ သာတယ်လို့ ငါထင်တယ်လို့ ပြောလိုက်တယ်။ ငြိမ်းမောင်ကလည်း ဟိုကောင့်ကို ကျွန်တော်မေးလိုက်တဲ့အကြောင်းကိုပဲ ကျွန်တော့်ကို မေးပြန်တယ်။ အဲဒီအကြောင်းတွေ သူနဲ့ယူမယ့် ကောင်မလေး မသိဘူးလို့ဘဲ ကျွန်တော်က ဖြေလိုက်တယ်။

နောက်တော့ မင်းဆွေဆီက သတင်းတွေ ကြားရပြန်တယ်။ မင်းဆွေက ရာထူးရာခံရှိတဲ့လူတွေနဲ့ အဆက်အသွယ်ရှိတယ်။ ဟိုကောင်နဲ့ယူမယ့် အမျိုးသမီးက ဟိုကောင့်ဆရာသမားတစ်ယောက် ဇနီးရဲ့တူမဆိုပဲ။ မင်းဆွေကတော့ စီးပွားရေးသမားဆိုတော့လည်း စီးပွားရေးအမြင်နဲ့ ကြည့်ပြီး တွက်ကိန်းနဲ့ယူတာပဲလို့ ကောက်ချက်ချတယ်။ ကျွန်တော်ကတော့ မိန်းမယူတယ်ဆိုတဲ့ စကားကို သိပ်မကြိုက်လှဘူး။ ယူတယ်ဆိုတာထက် ရတယ်လို့ ပြောရင်ကောင်းမယ်လို့ ထင်တယ်။ သူများ သားသမီးကို ယူထားတယ်ဆိုတာ သေသေချာချာစဉ်းစားကြည့်ရင် သိပ်မတရားဘူးထင်တယ်။ ရတယ်ဆိုမှ နှစ်ဦးနှစ်ဖက် သဘောတူကျေနပ်တဲ့သဘော ပါလိမ့်မယ်။ နောက်တော့ မင်းဆွေအမြင်လည်း မှန်လောက်တယ်လို့ လက်ခံလာရတယ်။ လက်ထပ်ပြီး နှစ်နှစ်လောက်အတွင်းမှာ ဟိုကောင်တစ်ယောက် ရန်ကုန်ကို ရာထူးရာခံကောင်းကောင်းနဲ့ ပြန်ရောက်လာပါလေရော။ သူ့သားကလေးတောင် တစ်နှစ်သာသာလောက်ရှိနေပြီ။ အဲဒီအခါကျတော့ ဟိုကောင်က ကျွန်တော်တို့အထဲက မင်းဆွေနဲ့ပိုပြီး တွေ့တာများတယ်။ ကျွန်တော်နဲ့ကတော့ အင်းလျားလိတ်မှာ အရက်သောက်ရင်း တစ်လ တစ်ခါ၊ နှစ်လ တစ်ခါလောက်ပဲတွေ့တယ်။ သူကတော့ အရင်က အတိုင်းပဲ။ ကျွန်တော်ကတော့ ရာထူးရာခံ ရှိတဲ့လူတွေနဲ့ မပေါင်းချင်ဘူး။ မှန်တယ်ထင်တာ ဖွင့်ပြောလေ့ရှိတော့ မတော်မတည့်ပြောမိခဲ့ရင် ကျွန်တော့်ကြောင့် သူတို့ ပြဿနာမပေါ်စေချင်ဘူး။ ပေါ်လို့ ပြုတ်သွားလည်း ကိုယ်က ကျွေးမွေးမထားနိုင်ဘူး။ သူနဲ့ အရက်သောက်ရင်တော့ သူက ဟိုအကြောင်း ဒီအကြောင်း ရင်ဖွင့်တယ်။ ဟိုကောင်မလေးကို ငါယူလိုက်ရင် ကောင်းသားလို့တဲ့ လွတ်တဲ့ငါးက ကြီးတယ်ဆိုတဲ့ ပုံပြင်တွေ။ ဘာကြောင့်မှန်းတော့ မသိဘူး။ ဟိုကောင်က ကျွန်တော့်ကိုတော့ အတော်ယုံတယ်။ ကျွန်တော်ကတော့ ကိုယ့်ကိုကိုယ်ကလွဲလို့ ဘယ်သူ့ကိုမျှ ယုံတတ်တဲ့လူမျိုး မဟုတ်ဘူး။ အဲဒီတုန်းက ကျွန်တော်တို့ အပေါင်းအသင်းတွေအထဲမှာ ကျွန်တော်တို့ လင်မယားက ကလေးနှစ်ယောက်ရနေပြီ။ အိမ်ထောင်သည်ဝါအရ အတော်ကြီးနေပြီ။ ကလေးကိစ္စနဲ့ပတ်သက်လို့ ကျွန်တော့်မိန်းမက အတွေ့အကြုံများနေတော့ ဟိုကောင့် မိန်းမက ဟိုမေးဒီမေး မေးရင်း သူတို့ချင်း ရင်းနှီးသွားကြတယ်။ ကျွန်တော်က သမီးချည်းပဲ နှစ်ယောက်မွေးထားတော့ သူ့သားလေးကို ချစ်တယ်။ သူ့သားကလေးက အမေဖက်လိုက်တော့ ဖြူတယ်။ ကျွန်တော်တို့ထဲက ငြိမ်းမောင်ကလွဲလို့ သူ့မိန်းမကို သူနဲ့ယူပြီးကာမှ သိကြရတာ။

ရန်ကုန်မှာ ဟိုတယ်ကိုရောက်တာနဲ့ ဟိုတယ်ကောင်တာက စာအိတ်တစ်ခု ပေးတယ်။ ဖွင့်ကြည့်လိုက်တော့ ဟိုကောင့်လက်ရေးနဲ့ စာတိုကလေးနဲ့ ဆင်း(မ)ကတ် တစ်ခု။ ဖုန်းကတော့ မင်းမှာပါမယ်ဆိုတာ ငါသိလို့ မပေးတော့ဘူး။ ကတ်ထဲမှာ ငါ့နံပါတ်ပါတယ်လို့ပဲ ရေးထားတယ်။ အခန်းထဲရောက်တာနဲ့ သူပေးတဲ့ ဆင်း(မ)ကတ်ကို စစ်ဆေးကြည့်လိုက်မိတယ်။ ဘာတွေများ ထည့်ထားသေးသလဲလို့။ ဒါပေမဲ့ သူ့ဆီတော့ ဖုန်းမဆက်ဖြစ်သေးဘူး။ အဲဒီတုန်းမှာပဲ ငြိမ်းမောင်ရောက်လာလို့ ဟိုတယ်က လော်ဘီဘားထဲ ဆင်းလာလိုက်မိတယ်။ ဝီစကီဖန်ခွက်နဲ့ ပါးစပ်တေ့မိကာရှိသေးတယ်။ ငြိမ်းမောင်က ဟိုကောင့်အကြောင်းကလေးတစ်ခု မင်းသိထားရအောင် ငါ လာပြောတာလို့ ပြောတယ်။ ကျွန်တော်လည်း ဖန်ခွက်ကိုကိုင်ထားရင်း သူဘာဆက်ပြောမလဲလို့ နားထောင်နေမိတယ်။ သူတို့လင်မယား အတူတူမနေကြတာ လေးငါးလလောက်ရှိပြီလို့ ငြိမ်းမောင်က ပြောတယ်။ ဘာလို့လဲလို့ သူ့ကိုမေးရင်း ဖန်ခွက်ကို ပါးစပ်နဲ့တေ့ထားလိုက်မိပြန်တယ်။ မသိဘူး။ အတူမနေကြတာဘဲ ငါသိတယ်လို့ သူက ပြန်ဖြေတယ်။ ဘယ်သူမျှမသိဘူးလားလို့ မေးတော့ ငြိမ်းမောင်က ခေါင်းခါပြတယ်။ သူတို့ပေါင်းလာတာ အနှစ်အစိတ်မကတော့ဘူး။ ဘာဖြစ်ကြတာလဲလို့ ထပ်မေးတော့ မင်းအကောင်ကို မင်းမေးကြည့်ပါလားလို့ ငြိမ်းမောင်က ပြောတယ်။ တို့အထဲမှာ မင်းကိုတော့ သူကယုံတယ်လို့ ထပ်ပြောတယ်။ ဒီတော့မှ ဟိုအကောင်က ကျွန်တော်နဲ့စကားပြောချင်တယ်ဆိုတာ ရင်ဖွင့်ချင်တာ နေမှာပဲလို့ တွေးကြည့်လိုက်မိတယ်။ ဘော်နီ မင်္ဂလာဆောင်တဲ့နေ့ကတွေ့တော့ သူက ငါ ညနေခင်းဘက်ကျရင် ဖုန်းဆက်လိုက်မယ်လို့ အသာကပ်ပြီးပြောသွားတယ်။ နောက်တော့ သူ့ဆီက ဖုန်းလာတယ်။ ညနေကျရင် အေးအေးဆေးဆေး မင်းနဲ့ငါနှစ်ယောက်တည်း ညစာ စားကြရအောင်လို့ ပြောပြီးချိန်းတယ်။ ငါလည်း ငါဝယ်လာတဲ့ ဝီစကီ မင်းကို တိုက်ချင်နေတာနဲ့ အတော်ပဲလို့ ပြောလိုက်တယ်။ မိန်းမကလည်း သူ့အစ်ကိုလင်မယားနဲ့ ညစာစားဖို့ ချိန်းထားပြီးဖြစ်နေတော့ ဟိုအကောင်နဲ့ ကျွန်တော်ချိန်းတဲ့ဆီ မလိုက်နိုင်ဘူး။ တကယ်တော့ မိန်းမက အစကတည်းက လိုက်ချင်လှတာ မဟုတ်ဘူး။ ခြောက်နာရီသာသာလောက် သူပြောတဲ့ သူစားနေကျ ရှမ်းဆိုင်ကလေးဆီ ချိန်းလိုက်တယ်။

ငါးဒုက္ခရဲ့ ဝေဒနာကို မစဉ်းစားဘဲ အသားနွှင်ပြီး စားနေတုန်း သူက မင်းနဲ့ငါ ဂျာကတာမှာ တွေ့တုန်းက မင်းပြောဖူးတဲ့အကြောင်း ထပ်ပြီးပြောပြစမ်းပါလို့ ပြောတယ်။ ကျွန်တော်က ဘာမှန်းမသိဘူး။ သူ့မျက်နှာကို လှမ်းကြည့်လိုက်တော့ သူက ပျံသွားတဲ့ငှက်တွေ အကြောင်းကွာလို့ ထပ်ပြောတယ်။ Flock Theory ကို မင်းပြောတာလားလို့ ကျွန်တော်က မေးလိုက်တယ်။ ဝီစကီကို မြည်းနေရင်း သူက ခေါင်းငြိမ့်ပြတယ်။ ငှက်အုပ်ကြီးတစ်ခု ပျံသွားတဲ့အခါ ငှက်တွေဟာ တိုင်ပင်မထားဘဲ စနစ်တကျ လိုက်ပါသွားတတ်ကြတယ်။ အုပ်စုကြီးတစ်ခုအနေနဲ့ ပျံသွားပေတဲ့ ငှက်တစ်ကောင်စီက သူ့အဆုံးအဖြတ်နဲ့ သူ ပျံသွားတာ။ တကယ်လို့ ငှက်တစ်ကောင် ပဲ့ထွက်သွားရင် ကျန်တဲ့ ငှက်တွေအထဲက တစ်ကောင်က ဝင်ပြီးနေရာယူတယ်။ အခက်အခဲတစ်ခုခု ပြောင်းလဲမှုတစ်ခုခုအတွက် သူတို့ဘာသာဖြေရှင်းနိုင်ကြတယ်။ သူတို့ချင်း သတ်မှတ်ပြဌာန်းထားတဲ့ စည်းကမ်းမရှိပေတဲ့ သူတို့ဘာသာ ဘယ်လိုလုပ်ရမယ်ဆိုတာကို သိတယ်။ လွယ်လွယ်ပြောရရင် တစ်ကောင်နဲ့တစ်ကောင် ဘယ်လောက်အကွာအဝေးမှာနေပြီး ပျံရမယ်ဆိုတာမျိုး သူတို့ဘာသာသိတယ်။ ဦးတည်ထားတဲ့ ခရီးဆုံးကိုရောက်အောင် အခက်အခဲ ကျော်လွှားပြီး ပျံနိုင်ကြတယ်။ တစ်နည်းပြောရရင် ငှက်အုပ်ကြီးဟာ ပုံစံအမျိုးမျိုး ပြောင်းပြီးပျံနေတယ်။ သတ်မှတ်မထားတဲ့ ဘောင်ထဲမှာ သူတို့ချင်း နားလည်မှုနဲ့ တည်ဆောက်ထားတဲ့ ပုံစံအရ ပျံသန်းနေကြတာပဲ . . လို့ ကျွန်တော်က သူ့ကိုရှင်းပြလိုက်ပြီး မင်းက ဘာလို့ ထပ်မေးတာလဲလို့လည်း မေးလိုက်မိတယ်။ အဲဒီအကြောင်းကို မင်းပြောပြီးကတည်းက တစ်ခါတစ်ခါ ငါ့ခေါင်းထဲမှာ ပေါ်လာတဲ့မေးခွန်းတစ်ခုရှိတယ်။ ငါသာငှက်ဖြစ်ခဲ့ရင် အဲဒီငှက်အုပ်ကြီးထဲမှာ မင်းပြောပြသလို တိုင်ပင်မထားဘဲ သူများလည်းမထိခိုက်ဘဲ ခရီးတစ်ခုကို လိုက်ပါ သွားနိုင်ပါ့မလားဆိုတဲ့မေးခွန်းပဲလို့ သူက ပြောတယ်။ ကြက်သွန်ဖြူ အချဉ်တစ်ဖက်ကို ကျေနပ်လောက်အောင် ဝါးပြီးတော့မှ ငှက်ဖြစ်ရင်တော့ ပြဿနာရှိလောက်မယ်မထင်ဘူးလို့ ကျွန်တော်က ပြန်ဖြေပြီး ရယ်လိုက်မိတယ်။ သူက ခေါင်းကို ဖြည်းဖြည်းချင်းညိတ်နေရင်း ပြုံးပြတယ်။ ဝီစကီနည်းနည်း သောက်ချလိုက်ရင်း မင်း ဝီစကီက အတော်ကောင်းတယ်လို့ ပြောလို့ ကျွန်တော်က ကျေးဇူးတင်ပါတယ်လို့ လှမ်းပြောလိုက်တယ်။ နောက်တော့ အတော်ကလေးကြာအောင် ကျွန်တော်တို့ချင်း ဘာမှ ထပ်မပြောဖြစ်ကြဘဲ စားပွဲပေါ်က ဟင်းတွေကို တစ်ခုစီမြည်းစမ်းကြည့်နေမိကြတယ်။

မင်းတို့လင်မယားက ဘာဖြစ်ကြတာလဲလို့ အဆက်အစပ်မရှိဘဲ ကျွန်တော်က သူ့ကိုမေးလိုက်မိတယ်။ အတော်ကြာအောင် သူက ဘာမျှပြန်မပြောဘူး။ ပြီးမှ လိုရင်းပဲပြောတော့မယ်ကွာလို့ ပြောတယ်။ ဘော်နီ မိန်းမယူတော့မယ်ဆိုတော့ တို့စေ့စပ်ကြောင်းလမ်းပေးတယ်။ တစ်ညတော့ ငါလည်း ငါ့မိန်းမကို မေးလိုက်မိတယ်။ မေးရတာက နှစ်တွေလည်းကြာခဲ့ပြီမို့ သူ့မှာလည်း ဒေါသထွက်စရာ၊ နာကြည်းစရာရှိတော့မယ်မထင်လို့ဘဲလို့ သူက ပြောတယ်။ ကျွန်တော့်စိတ်ထဲမှာတော့ ပထမနှစ်ကျောင်းသားဘဝတုန်းက သူ မိန်းမယူခဲ့ရတာကို ပြောပြတော့မှာပဲလို့ ထင်လိုက်မိတယ်။ သူက ကျွန်တော့်ကိုကြည့်နေရင်း ဆယ်တန်းတုန်းက ကားမှောက်လို့ ငါဆေးရုံတက်ခဲ့ရတာ မင်းမှတ်မိလားလို့ မေးတယ်။ ကျွန်တော်က ခေါင်းညိတ်ပြလိုက်တယ်။ သူက ကျွန်တော့်ကို မကြည့်တော့ဘဲ ပန်းကန်ပြားထဲက အသားတုံး တစ်တုံးကို တူနဲ့အသာညှပ်ယူလိုက်ပြီး ပါးစပ်ထဲ မထည့်သေးဘဲ ငါက အဲဒီကတည်းက သားသမီးမရနိုင်တော့ဘူးလို့ ပြောတယ်။ ကျွန်တော်ကတော့ အံ့သြသင့်သွားလို့ ဘာမျှမပြောနိုင်တော့ဘူး။ သူက ဆက်ပြောတော့မယ်အလုပ်မှာ ကျွန်တော်က လက်ကာပြီး တားလိုက်မိတယ်။ ဟိုကလေးကလည်း မင်းနဲ့ရတာမဟုတ်ဘူးပေါ့လို့ အဆီအငေါ်မတည့် မေးလိုက်မိတယ်။ သူက အံ့သြသင့်သွားပုံရတယ်။ မင်းကပါ ငါ့ကို အဲဒီလိုကောင်မျိုးထင်နေသလားလို့ ပြန်မေးတော့ ကျွန်တော် ခေါင်းခါပြလိုက်တယ်။ ဘာမျှ ပြန်မပြောလိုက်မိဘူး။ အဲဒီကောင်မလေးက မြိတ်က သူဌေးသားတစ်ယောက်နဲ့ဖြစ်တာ။ ကောင်မလေးအစ်ကိုနဲ့ ငါနဲ့ ခင်လို့ ငါက ကြားဝင်ရတာ။ နောက်တော့ ကောင်လေးဖက်က ဦးလေးက ကြားဝင်ပေးတာနဲ့ အားလုံးအဆင်ပြေသွားကြရောလို့ သူက ပြောတယ်။ အခု မင်းတို့လင်မယားဖြစ်တဲ့ကိစ္စကရောလို့ ကျွန်တော်က စကား ပြန်စပေးလိုက်မိတယ်။ သူက သူ့ဘာသာ နားမလည်နိုင်တဲ့သဘောမျိုးနဲ့ ခေါင်းခါနေတယ်။ ပြီးမှ ငါက သူ့ကိုမေးတယ်။ မမေးခင် စကားခံထားသေးတယ်။ ငါ့အနေနဲ့ အကျိုးအကြောင်း သိချင်တာပဲရှိတယ်။ စိတ်ဆိုးမှာမဟုတ်ဘူးလို့ ပြောထားလိုက်သေးတယ်။ ငါက သားသမီး မရနိုင်တဲ့လူမို့ ဘော်နီရဲ့အဖေဟာ ဘယ်သူလဲလို့ သိချင်တယ်လို့ မေးမိတယ်။

ဒီတော့ ငါ့မိန်းမက ဒေါသထွက်ပါလေရောလို့ သူက ပြောနေတုန်း ထွက်လောက်တာပဲလို့ ကျွန်တော့်ပါးစပ်က မရည်ရွယ်ထားဘဲ အသံထွက်သွားတယ်။ သူက နည်းနည်းပြုံးပြတာ တွေ့ရတယ်။ ငါ့မိန်းမက ဒေါသထွက်ရုံမကဘူး။ ငါ့ကို ပြောတယ်။ ရှင်ဟာ ကျွန်မကို တောက်လျှောက် ညာနေခဲ့တာပေါ့တဲ့။ ငါ စဉ်းစားလို့ မရဘူး။ တကယ်လို့ပြောမယ်ဆိုရင် ငါကသာ သူ့ကို ဒီစကားပြောရမှာလို့ သူ့ကို ပြောပြတယ်။ အဲဒီကတည်းက သူလည်း ဆင်းသွားတယ်။ အခု ဘော်နီ မင်္ဂလာဆောင်မှ ပထမဆုံး ပြန်တွေ့ကြ၊ စကားပြောကြတာ။ မပြောတတ်ဘူးကွာ။ ပြန်ပြီး အဆင်ပြေချင်လည်း ပြေမှာပေါ့။ မပြေလည်း ငါ မတတ်နိုင်ဘူး။ ငါ့အတွက်ရှေ့ရေးကတော့ ပင်စင်ယူ၊ ဂေါ့သီးရိုက်၊ သေဖို့ထိုင်စောင့်နေရုံပဲ ကျန်တော့တာပဲ မဟုတ်လားလို့ သူက ထပ်ပြောတယ်။ ကျွန်တော်ကတော့ တစ်ခုထပ်မေးလိုက်မိတယ်။ မင်းက ဘာဖြစ်လို့ အခုမှ အဲဒီဟာကို မေးရတာလဲ။ သူက ဘာမျှပြန်မဖြေဘဲ ခေါင်းခါပြတယ်။ ဘယ်လိုအနက်ကောက်ရမှန်းတော့မသိဘူး။ ဒီနောက် ကျွန်တော်လည်း ဘာမျှထပ်မမေးတော့ဘူး။ သူကလည်း သူ့အိမ်ထောင်ရေးအကြောင်း ထပ်မပြောဘူး။ ဟိုအကြောင်း၊ ဒီအကြောင်း။ ကျွန်တော့်သမီးတွေ၊ မြေးတွေအကြောင်း၊ ငယ်ငယ်တုန်းကအကြောင်း။ ရယ်စရာအကြောင်းတွေပဲပြောရင်း ဝီစကီတစ်လုံးနီးပါး သောက်လိုက်မိကြတယ်။ ဆယ်နာရီကျော်ကျော်လောက်ကျတော့ ဆိုင်ကလူတွေကြည့်ရတာ အိပ်ချင်နေကြပုံရတာနဲ့ပဲ ကျွန်တော်တို့ ထပြန်လာကြတယ်။ သူ့ကားနဲ့ ဟိုတယ်ကို လိုက်ပို့တယ်။ ကားပေါ်က ဆင်းကာနီးတော့ သူ့ကို တစ်ခါတည်း နှုတ်ဆက်လိုက်တယ်။ မနက်ဖြန်မနက် ကျွန်တော်တို့ လင်မယားက ခရီးဆက်ကြရဦးမှာမို့ သူ့ ဆင်း(မ)ကတ်ကို ပြန်ပေးလိုက်ရင်း မင်းကတ်ထဲမှာ ငါ့နံပါတ်တစ်ခု ထည့်ထားတယ်။ မင်းဆက်ချင်ရင် ဆက်ရအောင်လို့ ပြောလိုက်တယ်။ သူက လက်မထောင်ပြတယ်။

အခန်းထဲကို ဝင်လိုက်တော့ အိပ်ရာပေါ်မှာ လက်(ပ)တော့နဲ့ အလုပ်ရှုပ်နေတဲ့ မိန်းမကို တွေ့လိုက်ရတယ်။ မိုးချုပ်လှပြီ။ မအိပ်သေးဘူးလားလို့ မေးလိုက်မိတယ်။ သူက မော့ကြည့်ရင်း မနက်ဖြန် ဟိုရောက်ရောက်ချင်း ပြောစရာကလေးတွေ ရှိတယ်လို့ ပြောပြီး လက်(ပ)တော့ကို ပြန်ကြည့်နေတယ်။ မော့မကြည့်တော့ဘဲ ရှင့် အကောင်ကြီးတို့လင်မယားက ဘာဖြစ်ကြတာတဲ့လဲလို့ လှမ်းမေးတယ်။ သူမေးတာကို မဖြေသေးဘဲ ကုလားထိုင်တစ်လုံးကို ပြတင်းပေါက်အနားကိုဆွဲယူပြီး ပြတင်းပေါက်ဖက် မျက်နှာမူ ထားလိုက်တယ်။ ပြီးမှ မီနီဘားထဲက ဝီစကီပုလင်းကလေးသုံးလုံး ယူပြီး ဖန်ခွက်တစ်ခုအထဲ ဖောက်ထည့်လိုက်တယ်။ ကျောဖက်ကနေ မိန်းမက ကျွန်တော့်ကို ဘာမျှမပြောဘဲ သူ့စာကြည့်မျက်မှန်ကိုကျော်ပြီး စိုက်ကြည့်နေတယ်ဆိုတာ ကျွန်တော် မှန်ထဲကနေ မြင်နေရတယ်။ ကျွန်တော်လည်း ပြတင်းပေါက်နားက ကုလားထိုင်မှာ ထိုင်ချလိုက်ရင်း ဝီစကီကို နည်းနည်း ငုံလိုက်တယ်။ ပြတင်းပေါက် ဘောင်ပေါ် ခြေနှစ်ချောင်းစလုံး တင်လိုက်ပြီးမှ ဟိုကောင်နဲ့ ကျွန်တော်ပြောခဲ့တဲ့ စကားတွေ အကြောင်းကို ခရေစေ့တွင်းကျ ပြောပြလိုက်မိတယ်။ မိန်းမက ဘာတစ်ခွန်းမျှ ဝင်မပြောဘဲ နားထောင်နေလို့ သူ့ဖက်ကို တစ်ချက်တစ်ချက် လှည့်ကြလိုက်ရသေးတယ်။ အားလုံးပြောပြလို့ ပြီးသလောက်ရှိတော့ ကျွန်တော်က ဒါပဲ။ ငါတော့ နားမလည်ဘူး။ ဘယ်အပိုင်း နားမလည်သလဲလို့ မေးရင်တောင် ဘယ်အပိုင်း နားမလည်ဘူးဆိုတာ ပြောဖို့ခက်တယ်လို့ ပြောလိုက်မိတယ်။ မိန်းမက ချက်ချင်းဘာမျှ ပြန်မပြောဘူး။ ခဏကြာမှ သူ့မိန်းမပြောတာလည်း ဟုတ်တာပဲ။ ကျွန်မ မိန်းမတစ်ယောက်အနေနဲ့ မိန်းမဖက်က ဖက်လိုက်ပြောတာတော့ မဟုတ်ဘူး။ ရှင့်ကောင်ကြီးက တစ်သက်လုံးညာလာတာပဲလို့ လှမ်းပြောတယ်။ ကျွန်တော့်ရဲ့ နားမလည်နိုင်ခြင်းနယ်ပယ်တွေဟာ ကျယ်ဝန်းသည်ထက် ကျယ်ဝန်းသွားတယ်။ သူ့ကို တစ်ခုခုတော့ ပြန်ပြောဦးမယ်လို့ သူ့ဖက်လှမ်းကြည့်လိုက်တော့ ကျွန်တော်က ဘာမျှမပြောရသေးခင် သူက လှမ်းပြောတယ်။ ကျွန်တော့်ကို ဦးတည်ပြောတာမျိုးမဟုတ်ဘူး။ ပြောပုံက မှတ်ချက်ချလိုက်တာမျိုး။ ရှူနေရတဲ့လေရဲ့ ရှိနေခြင်းကို အသိအမှတ်မပြုချင်ဘဲ စာရွက်ပေါ်မှာ ဖော်မြူလာချရေးပြီး အောက်ဆီဂျင်ထုတ် ရှူကြည့်ချင်တဲ့လူတွေလို့ ပြောတယ်။ ပြီးတော့ သူလက်(ပ)တော့ကို ပိတ်လိုက်ပြီး ရေခဲစက်ရှိရာကို ထသွားပြီး အေဗျံ တစ်ပုလင်းသွားယူတယ်။ သူပြောတဲ့ “လူတွေ” ဆိုတဲ့အထဲက လူစာရင်းမှာ ကျွန်တော်လည်း ပါကောင်းပါမလားတော့ မပြောတတ်ဘူး။ ယေဘူယျကျနတဲ့ အသုံးအနှုန်းမှန်သမျှဟာ လူကို အန္တရာယ်ရှိနိုင်တယ်ဆိုတဲ့ စကားလိုပဲ။ မိန်းမက ခုတင်ဆီပြန်သွားပြီး ဂွတ်နိုက်လို့ ကျွန်တော့်ကို လှမ်းပြောတယ်။ သူ့ဖက်က စာကြည့်မီးကို ပိတ်လိုက်တယ်။ ကျွန်တော်လည်း ဂွတ်နိုက်လို့ လှမ်းပြောပြီး သူအိပ်တာ အနှောင့်အယှက်မဖြစ်အောင် ကျွန်တော့်ဖက်နားက မီးကို လှမ်းပိတ်ပေးလိုက်တယ်။

အမှောင်ထဲမှာ ထိုင်နေရင်း ဝီစကီကို နည်းနည်းသောက်ချလိုက်ပြီး အပြင်ဖက်ဆီ ငေးကြည့်နေမိတယ်။ ဟိုနား ဒီနားဆီက မီးရောင် လက်လက်ကလေးတွေ တွေ့ရပေတဲ့ ကောင်းကင်တစ်ခုလုံး မည်းမှောင်နေတာပဲ။ လမိုက်ညထင်တယ်။ ကောင်းကင်ရံထဲမှာ တစ်ကိုယ်တည်း ပျံလေ့ရှိတဲ့ ညဥ့်ငှက်တစ်ကောင်ကောင်ကိုများ တွေ့ရလေမလားလို့ ကျွန်တော်ကြည့်နေမိတယ်။ ဘာကြောင့်မှန်းတော့ မသိဘူး။ ဂဲဂဲလို့ အော်ရင်း တစ်ကောင်တည်း ပျံလေ့ရှိတဲ့ ညဥ့်ငှက်ကြီးတွေကို ကျွန်တော် သဘောကျတာတော့ အမှန်ပဲ။ မတွေ့ရမယ်မှန်း သိပေတဲ့ အမှောင်ထဲကိုပဲ ကြည့်နေမိတယ်။ မျက်စေ့တစ်ဆုံးက မိုးကုတ်စက်ဝိုင်းမှာ ဘာအလင်းရောင်မှ မတွေ့ရဘူး။ ထိုင်ကြည့်နေမိတာ ဘယ်လောက်ကြာသွားမှန်း မသိလိုက်ဘူး။ လက်ထဲက နာရီကို ကြည့်လိုက်တော့ သန်းခေါင်ကျော်နေပြီ။ ခုဆို ပစိဖိတ်သမုဒ္ဒရာထဲက တစ်နေရာရာမှာ နေထွက်လောက်ပြီ။ ဂျီဘူတီမှာဖြစ်ဖြစ်၊ အဘူဒါဘီမှာဖြစ်ဖြစ် နေဝင်လောက်ပြီ ထင်တယ်။

< ချင်းတွင်း | အောက်တိုဘာ | ၂၀၀၇ >