အိပ်မက်ထဲမှာ သူမမရှိဘူး

ကျွန်တော် မြို့ကလေးတစ်ခုကို ရောက်မှန်းမသိရောက်နေတယ်။ မြို့မှာ လျှပ်စစ်မီးရှိတယ်။ လက်ကိုင်ဖုန်းရှိတယ်။ ကွန်ပျူတာသင်တန်း ရှိတယ်။ ဂျင်းဘောင်းဘီဝတ်တဲ့ ယောက်ျားလေးတွေနဲ့ ထဘီဝတ် ကောင်မလေးတွေရှိတယ်။ ပြီးတော့ မြို့လေးမှာ ကျွန်တော် မတွေ့ချင်လို့ မတွေ့အောင် လိုက်ရှာနေတဲ့သူ တစ်ယောက်ရှိတယ်။ မြို့ကလေးမှာ မျက်နှာသိတွေ အတော်များတယ်။ ကျွန်တော် မြို့ကလေးရဲ့ တောင်ကုန်းထိပ်ပေါ်မှာ ဘာကြောင့်မှန်းမသိ မူးဝေနေတယ်။ “ငါတို့က လောကနဲ့ အတော်စိမ်းကားလာပြီ” လို့ပြောတော့ သူ့ကိုကြည့်လိုက်တော့ သူ့လက်ထဲမှာ အမြည်းထုပ်နဲ့။ ပြေးရင်းလွှားရင်း လောင်းကစားနည်းတစ်ခုကို ကျွန်တော်သင်ယူ တတ်မြောက်ခဲ့တယ်။ ခပ်တောင့်တောင့် အမျီုးသမီးတစ်ယောက် ဘေးကဖြတ်လျှောက်သွားတဲ့အခါမှာ ကျွန်တော့်ရဲ့ လိင်ပိုင်းဆိုင်ရာ လိုအင်တွေ သူမထံပါသွားခဲ့တယ်။ မြို့ကလေးမှာ တက္ကသိုလ်ကျောင်းသား၊ ကျောင်းသူတွေအတွက် အချစ်လမ်းကြားရှိတယ်။ မြောင်းကျယ်ကျယ်ရဲ့ လမ်းဘေးမှာ ထိုင်နေကြတဲ့အတွဲတွေ အများကြီးပဲ။ ဂစ်တာတီးနေကြတဲ့ ကျောင်းသားတွေ။ ကောင်မလေး သူတို့ထဲမှာ မပါဘူး။ သူတို့ထဲမှာ ကျွန်တော်ရှာနေတဲ့ ကောင်မလေးကို မတွေ့ရဘူး။ ကောင်မလေး ကျွန်တော့်အိပ်မက်ထဲမှာ မပါလာဘူး။ အိပ်မက်ထဲမှာ သူမမရှိဘူး။

(၂၇ . ၃ . ၂၀၁၀)
ညနေ ၄ နာရီ ၂၅ မိနစ်