ဟိုနေ့က ကျွန်တော်သီချင်းတစ်ပုဒ် နားထောင်ဖြစ်တယ်။ မြန်မာသီချင်းပါ။ အင်္ဂလိပ်သီချင်း သံစဉ်ကို မြန်မာစာသားထည့်ပြီး ဆိုထားတာ။ သူငယ်ချင်းက နားထောင်ရင်းပြောတယ်။
“ကော်ပီကြီး...” တဲ့
ကျွန်တော့်ခေါင်းထဲ အတွေးတွေဝင်လာတယ်။ အနုပညာမှာ ကော်ပီရှိသလား။ သီချင်းတစ်ပုဒ်က အနုပညာပစ္စည်းမှန်ပေမယ့် ကော်ပီသီချင်းတစ်ပုဒ်ကရော။ အနုပညာမြောက်ရဲ့လား။ ကျွန်တော်နဲ့ သူငယ်ချင်းနဲ့ အဲဒီအကြောင်းကို လက်ဖက်ရည်ဆိုင်မှာ အချိန်အတော်ကြာ ငြင်းနေကြတယ်။ သူက အနုပညာမှာ ကော်ပီမရှိဘူး။ ကော်ပီပစ္စည်းတွေဟာ အနုပညာမမြောက်ဘူး။ ကျွန်တော်က ကော်ပီလည်း အနုပညာပဲ။ စသည်ဖြင့်ပေါ့။
ဘာပဲဖြစ်ဖြစ် အနုပညာနဲ့ အလှမ်းဝေးတဲ့ ကလေးနှစ်ယောက်က လက်ဖက်ရည်ဆိုင်မှာ ဒီလိုကိစ္စကို ငြင်းခုံနေတယ်ဆိုတာက လူဟားချင်စရာကြီးပါ။ ဒါကြောင့် ကျွန်တော်တို့နှစ်ယောက်လဲ ဘယ်သူမှမဟားခင် သရေပွဲနဲ့ ကျေနပ်လိုက်ကြတယ်။ ဒါပေမယ့် အဲဒီ “ကော်ပီ” ဆိုတာကြီးက ကျွန်တော့်အိမ်အထိပါလာပြီး ညအိပ်လို့မရအောင် လာလုပ်နေတယ်။
“အနုပညာမှာ ကော်ပီရှိသလား...”
ရှိတယ်ဆိုတဲ့ဘက်က ကြည့်ရအောင်။ ရှိတယ်။ ဓာတ်ပုံပညာကိုပဲ ကြည့်လေ။ တကယ်ရှိပြီးသား မြင်ကွင်းကိုပဲ ဖလင်ပေါ်မှာ ကော်ပီကူးတာပဲ။ ဒါဟာ ကော်ပီပဲ။ ပန်းချီလဲ အဲဒီအတိုင်းပဲ။ ရှိပြီးသားကို ဖန်တီးတာ။ စာပေလည်း ကော်ပီလို့ပြောလို့ရတယ်။ ရွှေဥဒေါင်းတို့ မှီးရေးတယ်ဆိုတာ ကော်ပီတွေပဲပေါ့။ ဒီ post ကလည်း ဘယ်ကမှ ကော်ပီကူးထားတာမဟုတ်ပေမယ့် ဒါဟာ ကျွန်တော့် စိတ်ကူးရဲ့ ကော်ပီတစ်ခုပဲ။ သီချင်းမှာကော... ကော်ပီတွေ အများကြီးပဲ။
ကော်ပီမရှိဘူးဆိုတဲ့ဘက်က ရှင်းတယ်။ အနုပညာပစ္စည်းဆိုတာ အနုပညာရှင်ရဲ့ စိတ်ကူးဥာဏ်ကွန့်မြူးမှုကနေ ပေါက်ဖွားလာတဲ့ အသစ်သော ဖန်တီးမှုတစ်ခုပဲဖြစ်တယ်။ ကော်ပီလုံးဝမဟုတ်ဘူး။ ကော်ပီလုပ်ထားတဲ့ အနုပညာပစ္စည်းတွေဟာလည်း အတုအယောင်တွေပဲ။ အနုပညာပစ္စည်းအစစ်မဟုတ်ဘူး။
ကျွန်တော်ဥာဏ်မှီသလောက် တွေးမိတာပါ။ တကယ်တမ်းဆို ကျွန်တော့်လိုကောင် တစ်ယောက်က ညအိပ်ပျက်ခံပြီး ဒီကိစ္စကို ထိုင်တွေးနေတာဟာ အင်မတန်ရှက်ဖို့ကောင်းပါတယ်။ ဘာပဲဖြစ်ဖြစ် ကျွန်တော် စဉ်းစားရင်း သတိထားမိလာတာ တစ်ခုရှိတယ်။ အနုပညာရဲ့ အခြေခံဖြစ်တဲ့ လက်တွေ့ဘဝဟာလည်း အစစ်အမှန်ဟုတ်ရဲ့လား။
ကျွန်တော်သိရသလောက်တော့ လက်တွေ့လောကမှာလည်း အစစ်အမှန်တွေ မရှိတော့ပါဘူး။ ကျွန်တော်တို့ မွေးကတည်းက သေဆုံးချိန်အထိ သင်ယူနေရတယ်။ သင်ယူတယ်ဆိုတာကလည်း ကိုယ့်အသိဥာဏ်ထဲကို ကော်ပီပွားယူတာပဲမှတ်လား။ ကျွန်တော်တို့ နေ့စဉ်လှုပ်ရှား သွားလာနေသမျှဟာ သူတစ်ပါးရဲ့ ကော်ပီတွေပဲ မဟုတ်ပါလား...။ အတုအယောင် တွေပဲ မဟုတ်ပါလား..။ ကျွန်တော်တို့ မွေးဖွားလာတယ်။ သေဆုံးသွားကြတယ်။ ဘာမှမကျန်ခဲ့ပါဘူး...။ အကုန်အတုအယောင်တွေပါပဲ..။
ကျွန်တော်ကိုယ့်ကိုယ်ကို ပြန်ကြည့်မိတယ်။ ကိုယ်ကိုယ်တိုင် အတုကြီးလို့ ခံစားလာရတယ်။ ကျွန်တော်ငယ်ငယ်ကတည်းက သူများတွေရဲ့ စိတ်ဓာတ်၊ အမူအကျင့်တွေ နည်းနည်းကူးစက်တတ်တယ်။ ကိုယ်အထင်ကြီးတဲ့ လူတစ်ယောက်ရဲ့ စိတ်ဓာတ်၊ အတွေးအခေါ်တွေ အနည်းနဲ့ အများ ကူးစက်တတ်တယ်။ ကိုယ်ပိုင်ဆိုတာ မရှိသလောက် ဖြစ်နေတယ်။ လူအစစ်မဟုတ်ပဲ လူအတုဖြစ်နေတယ်။
တွေးရင်းနဲ့ စိတ်ပျက်လာတယ်။ ကျွန်တော် လူအတုမလုပ်ချင်တော့ဘူး။ လူအစစ်ဖြစ်ချင်နေပြီ။ ဘယ်သူ့လမ်းမှ မလျှောက်ချင်တော့ဘူး။ ကိုယ့်လမ်းကိုယ်ဖောက်ချင်တယ်။ သူများနောက်ကို မလိုက်ချင်တော့ဘူး။ တစ်ယောက်ထဲ သီးသန့်လွတ်လပ်ချင်ပြီ။ ဆရာ တာရာမင်းဝေ စကားနဲ့ပြောရရင် လူ့တစ်ပတ်နွမ်းမဖြစ်ချင်တော့ဘူး။ လူအသစ်ဖြစ်ချင်တယ်။
“လောကမှာ စစ်မှန်တယ်ဆိုတာ အတုအယောင်တွေပဲ ရှိတော့တယ်...”
စာကြွင်း။ ။ လောလောဆယ်တော့ ဝတ္ထုတိုတစ်ပုဒ် ကော်ပီရေးနေတယ်။ နောက်နေ့တွေ တင်ပေးမယ်။
1 comment:
I think, that you are not right. Write to me in PM, we will talk.
Post a Comment