ကိုယ်ပိုင် စာကြည့်တိုက်

 ပညာဆိုတာ အင်မတန် တန်ဖိုးကြီးပါတယ်။ ပညာရှိရင် ဘာမဆိုဖြစ်ပါတယ်။ လက်ဖက်ရည်ဆိုင် မှာ ငြင်းတဲ့အခါ နိုင်အောင်ငြင်းနိုင်ရုံမက နိုင်ငံတစ်နိုင်လုံးကိုပါ ဦးဆောင်နိုင်ပါတယ်။ ပညာအများစုဟာ စာအုပ်တွေထဲမှာ ရှိပါတယ်။ စာများများဖတ်လေ၊ အတွေ့အကြုံပိုရှိလေ၊ ပိုစဉ်းစားတတ်လာလေ၊ ပညာရှိလေပါပဲ။ ကျွန်တော်ကတော့ အသက်ကို ပညာနဲ့တိုင်းပါတယ်။ ဒါကြောင့် စာအုပ်တွေဟာ ဘဝမှာ အရေးပါဆုံး အခန်းကဏ္ဍကနေ ပါဝင်နေပါတယ်။

နိုင်ငံတစ်နိုင်ငံ တိုးတက်ဖို့ရာ နိုင်ငံသားတွေ ပညာတတ်ရေးပါ အရေးပါဆုံးပါ။ နိုင်ငံသားတွေ ပညာတတ်ရန် စာကြည့်တိုက်တွေဟာ လိုအပ်ပါတယ်။ အခု မြန်မာပြည်မှာ ကျေးရွာစာကြည့်တိုက်တွေ၊ မြို့နယ်စာကြည့်တိုက်တွေ ဗုံးပေါလအော ဖွင့်နေတာ သတင်းစာထဲမှာ တွေ့ရပါတယ်။ အောင်မြင်သလား မအောင်မြင်သလား မသိပါ။ ကျွန်တော် စဉ်းစားကြည့်ပါတယ်။ ဘယ်လိုကူညီနိုင်မလဲပေါ့။ အလှူငွေထည့်ဖို့လဲ အပိုငွေမရှိပါ။ အမြတ်တနိုး စုဆောင်းထားတဲ့ စာအုပ်တွေ လှူပစ်ဖို့ဆိုတာကလဲ မလွယ်ပါဘူး။ ဒါကြောင့် နိုင်ငံတော်တိုးတက်ရေးကို ကူညီပေးတဲ့အနေနဲ့ ကိုယ်ပိုင်စာကြည့်တိုက် လုပ်ဖို့ စဉ်းစားကြည့်ပါတယ်။

ကျွန်တော် စာကြည့်တိုက်မှူးပညာကို မလေ့လာဖူးပါ။ ဒါပေမယ့် စာကြည့်တိုက်တွေတော့ သွားဖူးပါတယ်။ စာကြည့်တိုက်တွေ ဘယ်လိုအလုပ်လုပ်သလဲဆိုတာ သိတန်သလောက် သိမယ်တော့ ထင်ပါတယ်။ ကိုယ်ပိုင်စာကြည့်တိုက်ဖွင့်ဖို့ရာ ဘာမျှမခက်ပါ။ အရင်ဆုံး ပြင်ဆင်ဖို့ လိုပါမယ်။ အရင်ဆုံး စာအုပ်စင် တစ်ခုဝယ်ပါ။ စာအုပ်တွေ ပြန့်ကျဲနေတာထက်စာရင် ပိုခန့်ပါတယ်။ Decoration အနေနဲ့လည်း အသုံးဝင်ပါတယ်။ စာအုပ်စင်ဝယ်တာမှာ ကိုယ့်မှာရှိတဲ့ စာအုပ်အရေအတွက်နဲ့ နည်းနည်းတိုက်ဝယ်ပါ။ စာအုပ်ဟောင်းလောင်းနဲ့ စာအုပ်စင်ဟာ အင်မတန် အရုပ်ဆိုးပါတယ်။

နောက်တစ်ချက်က စာအုပ်တွေကို ဝယ်ဖတ်ပါ။ ငှားမဖတ်ပါနဲ့။ ဈေးကြီးတာမှန်ပါတယ်။ ဒါပေမယ့် ဝယ်ဖတ်ပါ။ စာအုပ်များများဖတ်ဖို့ထက် ကိုယ်ဖတ်တဲ့စာအုပ်ကို ကျေကျေညက်ညက်ဖတ်ဖို့က ပိုအရေးကြီးပါတယ်။ သိပ်ရှားပါးနေတဲ့ ဒါမှမဟုတ် သိပ်ဈေးကြီးနေတဲ့ စာအုပ်မျိုးဆို မိတ္တူဆိုင်မှာ ကော်ပီသွားကူးပါ။ ဒီလိုနဲ့ စာအုပ်တွေများလာပြီး  စာအုပ်စင်ဟာ ကျက်သရေရှိလာမှာ ဖြစ်ပါတယ်။

စာအုပ်စီခြင်း နှင့် ထိန်းသိမ်းခြင်း

စာအုပ်စီတာ သိပ်မခက်ပါဘူး။ စာရေးဆရာ နာမည်နဲ့ စီတာပါပဲ။ ဒစ်ရှင်နရီဖတ်တတ်ရင် စာအုပ်စီတတ်ပါတယ်။ နာမည်နဲ့စီတဲ့အခါမှာ မြန်မာကလောင်နာမည်တွေက အခက်အခဲမရှိပါဘူး။ နိုင်ငံခြား စာရေးဆရာတွေကို စီတဲ့အခါမှာ စာကြည့်တိုက်တွေမှာတော့ သူတို့ရဲ့ မျိုးရိုးနာမည် Last Name နဲ့ စီကြပါတယ်။ ဥပမာ George Orwell နဲ့ Raymond Carver ဆိုရင် Raymond Carver ကို အရှေ့မှာ ထားကြပါတယ်။ ကျွန်တော်တော့ မကြိုက်ပါ။ မူရင်းအတိုင်း စီတာ ပိုကြိုက်ပါတယ်။ အဲတော့ J.S. Mill တို့ H.G. Well တို့ကြတော့လည်း ခေါင်းစားပါတယ်။ သူတို့နာမည် အရှည်ကောက်တွေ တစ်ခေါက်ပြန်ရှာနေရတာကလည်း အလုပ်တစ်ခုပါပဲ။ ဒေါက်တာ၊ ဦး စတဲ့ ဂုဏ်ပုဒ်တွေကိုပါ ထည့်စီပါတယ်။

စာအုပ်တွေက သိပ်များနေရင်တော့ အမျိုးအစားလိုက် ခွဲတာ ကောင်းပါတယ်။ Normally သုံးထပ် စာအုပ်စင် နှစ်ခုလောက် ဖြစ်နေရင်တော့ အမျိုးအစားခွဲတာ အဆင်ပြေမယ် ထင်ပါတယ်။ တချို့ကြတော့လည်း အမျိုးအစား နှစ်မျိုးသုံးမျိုးလောက်ပဲ ဖတ်တော့ အမျိုးကွဲတွေ သိပ်မရှိဘူး ဖြစ်နေတတ်ပါတယ်။ လိုတော့ မလိုပါ။ Specific စာရေးဆရာတစ်ယောက်ရဲ့ စာအုပ်တွေ ရှာတဲ့ အခါမျိုးမှာ ပြဿနာတတ်ပါတယ်။ Bertrand Russell စာအုပ်တွေဆိုရင် Philosophy မှာ သုံးလေးအုပ်၊ Sociology မှာ တစ်အုပ်နှစ်အုပ် ဖြစ်နေတတ်ပါတယ်။

 အရေးကြီးတာက စာအုပ်တွေကို ယူဖတ်ပြီးရင် သူ့နေရာသူ ပြန်ထည့်ဖို့ပါ။ ကျွန်တော် ခဏခဏ စာအုပ် စီပါတယ်။ ခဏခဏ ပျက်ပါတယ်။ အပျင်းကြီးတာက အဓိကပါပဲ။ စာအုပ်ကလေး သွားထည့်လိုက်တာဟာ ငါးစက္ကန့်လောက်ပဲ ကြာပါတယ်။ နာမည်အစဉ်အတိုင်း ပြန်ထည့်ဖို့ မမေ့ပါနဲ့။ နာမည်စီတဲ့အခါ အပေါ်ဆုံးအဆင့် နံရံနဲ့ နီးတဲ့ဘက်က စပြီး စီပါ။ ဒါမှမဟုတ် အခန်းကို ဝင်တဲ့ တံခါးနဲ့ ဝေးတဲ့ဘက်က စပြီး စီပါ။ မဂ္ဂဇင်းတွေ ဂျာနယ်တွေကို စာအုပ်စင်မှာ မထည့်ပါနဲ့။ တစ်နှစ်စီ Plastic အိတ်နဲ့ ထည့်ထားပါ။ အရမ်းများလာပါက ဂိုဒေါင်၊ သို့မဟုတ် ထပ်ခိုးထဲထည့်ထားပါ။ မရှိလျှင် ရောင်းစားပါ။ မဂ္ဂဇင်းတော့ သိမ်းချင် သိမ်းထားပါ။ ဂျာနယ်၊ သတင်းစာတွေက ငါးနှစ်ကြာတဲ့အခါ ပြန်ဖတ်စရာ သိပ်မလိုတော့ဘူး ထင်ပါတယ်။

(အချို့ စာဖတ်သမားတွေ လုပ်လေ့ရှိတဲ့ အကျင့်တစ်ခုက သတင်းစာ၊ ဂျာနယ်တွေမှာ စိတ်ဝင်စားတဲ့ သတင်း၊ ဆောင်းပါး တွေ့ရင် ညှပ်ယူထားပြီး ရက်စွဲနဲ့အတူ ဖိုင်တွဲတာဖြစ်စေ၊ စာအုပ်မှာ ကပ်တာဖြစ်စေ လုပ်ကြပါတယ်။ ရက်စွဲအလိုက် စာအုပ်တွေကို ပြန်ရှာရတာ လွယ်ပါတယ်။ တော်တော်ကောင်းတဲ့ အကျင့်ဆိုပေမယ့် လိုက်လုပ်ဖို့က တော်တော်မလွယ်ပါ။ အကျင့်ဖြစ်ဖို့က အစပိုင်း တော်တော်လေး သတိထားမှ ရပါမယ်။ ပြီးတော့ အခုခေတ်မှာ အဲလိုလုပ်ဖို့ သိပ်မလိုတော့ဘူး ထင်ပါတယ်။ သတင်းစာ/ဂျာနယ်တွေက online archive တွေ ရှိနေပါပြီ။)

စွယ်စုံကျမ်းလို စာအုပ်မျိုး၊ reference စာအုပ်မျိုးဆိုရင်တော့ စာအုပ်စင်ရဲ့ အစ ဟိုးအပေါ်မှာ ထားပါ။ အင်မတန် ခန့်ပြီး ခဏခဏ ထုတ်ရတဲ့ အတွက်ဖြစ်ပါတယ်။ စွယ်စုံကျမ်းလို အတွဲလိုက် စာအုပ်တွေကို volume အကုန် ရှာဝယ်ပါ။ ဒစ်ရှင်နရီ၊ ဂစ်တာတီးနည်း၊ အင်္ဂလိပ် grammar စတဲ့ learning စာအုပ်တွေ စာအုပ်စင်ပေါ် မတင်ပါနဲ့။ Impression ကျပါတယ်။ နောက်အရေးကြီးတာက ဖုန်သုတ်ပါ။ တစ်ပတ်တစ်ခါလောက် သုတ်ပေးရင် တစ်မိနစ်လောက်နဲ့ ပြောင်ပါတယ်။ မသုတ်တာကြာလေ သုတ်ရတဲ့အချိန်ကြာလေပါပဲ။ နောက်ပိုင်း ပျင်းပြီးတော့ လုံးဝမသုတ်တော့တာမျိုး ဖြစ်တတ်ပါတယ်။ စာကြည့်တိုက်အတွက်ပဲ မဟုတ်ပါဘူး၊ တစ်အိမ်လုံးအတွက် (အထူးသဖြင့် တစ်ယောက်တည်းနေတဲ့အခါ) maintenance day သတ်မှတ်ထားတာဟာ ကောင်းတဲ့အကျင့်ပါပဲ။

Catalogue လုပ်ခြင်း

စာအုပ်တွေကို catalogue လုပ်ပါ။ Catalogue လုပ်တာ သိပ်မခက်ပါဘူး။ စာအုပ်စင်ထဲ စာအုပ်တွေ မထည့်ခင် အဖုံးတွေကို ဓာတ်ပုံရိုက်ထားပါ။ တတ်နိုင်ရင် scan ဖတ်ထားပါ။ online မှာရှိရင် ရှာထားပါ။ ပြီးရင် MS Word ဖြစ်ဖြစ် photoshop ဖြစ်ဖြစ် တစ်ခုခုမှာ စာအုပ်နာမည် စာရေးသူ စသဖြင့် တွဲထားလိုက်ပါ။ ကိုယ့်ဟာကိုယ် ဒီဇိုင်းကို လုပ်လို့ရပါတယ်။ စာအုပ်စာရင်းပေါ့။ Catalogue မှာတော့ စာရေးသူနာမည်နဲ့ စီချင်လည်း ရပါတယ် မစီလည်းဖြစ်ပါတယ်။ ပြီးရင် ပရင့်ထုတ်ပြီး ဖိုင်တွဲထားလိုက်ပါ။ စာအုပ်မချုပ်ပါနဲ့။ ဘာကြောင့်ဆို နောက်ထပ် အသစ် update တစ်လတစ်ခါ လုပ်ပါ။ နာမည်နဲ့မစီဘဲထားတော့ Catalogue ကြည့်တဲ့အခါမှာ နောက်ဆုံးရောက်တဲ့ စာအုပ်ကို သိနိုင်ပါတယ်။ ပြီးရင် Catalogue ကို စာအုပ်စင်အပေါ်မှာပဲ ထားပါ။ အခြား ဘယ်နေရာမှ မထားပါနဲ့။ ပျောက်တတ်လွန်းလို့ပါ။

Running the Library

အခုလောက်ဆို ကိုယ်ပိုင်စာကြည့်တိုက် ဖြစ်နေပါပြီ။ အခန်းထဲမှာ စားပွဲနဲ့ ကုလားထိုင် အနည်းဆုံး တစ်လုံး ထားပါ။ စာဖတ်ရင် အဲဒီစားပွဲမှာပဲဖတ်ပါ။ ကုတင်ပေါ်မှာ ဖတ်တာမျိုး လုံးဝမလုပ်ပါနဲ့။ တခြားအခန်းကိုလည်း စာအုပ်တွေ လုံးဝမယူသွားပါနဲ့။ စာကြည့်စားပွဲ တစ်ခုတည်းမှာပဲ စာဖတ်ပါ။ စာရေးတာကိုလည်း အဲလိုပဲ လုပ်ပါ။

အားလုံးအဆင်သင့်ဖြစ်ပြီဆိုလျှင် အသိမိတ်ဆွေတွေကို အိမ်မှာ စာကြည့်တိုက် ဖွင့်ကြောင်းပြောပါ။ ရပ်ကွက်ထဲက ကလေးတွေကိုလည်း ပြောပါ။ အိမ်မှာလာဖတ်နိုင်တဲ့အကြောင်း ပြောပါ။ အွန်လိုင်းက မိတ်ဆွေတွေ၊ social network တွေ၊ blog တွေမှာလည်း ကြော်ငြာပါ။ ပိုက်ဆံတွေ သိပ်ပေါနေလျှင် သတင်းစာ၊ ဂျာနယ်၊ မဂ္ဂဇင်း၊ ကိုရီးယားကား၊ ဝက်ဘ်ဆိုက်တွေမှာ လျှောက်ကြော်ငြာပါ။

စာအုပ်ငှားခြင်း

လူတိုင်းကို စာအုပ်မငှားပါနဲ့။ ကိုယ်နဲ့ ခင်တဲ့သူပဲ ငှားပါ။ သုံးလေးလမှ တစ်ခေါက်လောက် တွေ့တဲ့သူကိုလည်း မငှားပါနဲ့။ ဆက်သွယ်ရ လွယ်တဲ့သူကိုပဲ ငှားပါ။ ပြန်မပေးတတ်တဲ့သူကို မငှားပါနဲ့။ ပြန်ပေးမယ်ဆိုမှ ငှားပါ။ ကျွန်တော့်ကို မငှားပါနဲ့။ နောက်တာပါ။ မငှားနိုင်တဲ့သူကို ခေါ်ကတည်းက စာအုပ်မငှားဘူးဆိုတာကို ပွင့်ပွင့်လင်းလင်း ပြောထားပါ။ အွန်လိုင်းမှ ကောင်မလေး ချောချောကလေးတွေကိုလည်း ဖွန်ကြောင်ပြီး မငှားပါနဲ့။ ဒီတော့မှ အိမ်ကို ခဏခဏ လာမှာပါ။

ညအိပ်ခါနီးကျရင် ဒီနေ့ ဘယ်သူ့ကို ဘာစာအုပ်ငှားလိုက်သလဲဆိုတာကို စဉ်းစားပြီး ရေးမှတ်ထားပါ။ အခြား တစ်ယောက်က အဲဒီစာအုပ်ကို ဖတ်ချင်တယ်ဆိုရင် ငှားသွားတဲ့သူကို သိနိုင်အောင်လို့ဖြစ်ပါတယ်။ ဖြစ်နိုင်ရင် အဲဒီစာအုပ်အကြောင်းကိုပါ စဉ်းစားပါ။ စာဘယ်လောက် ကြေသလဲဆိုတာကို ဆန်းစစ်လို့ ရပါတယ်။

ကြွားပါ

စာကြည့်တိုက် ဖွင့်တယ်ဆိုတာ နိုင်ငံကို အကျိုးပြုခြင်း တစ်ရပ်ပါပဲ။ ဒါကြောင့် လူများများ လာအောင် ဆွဲဆောင်ရပါမယ်။ အနည်းဆုံး တစ်ယောက်က ကိုယ့်ကြောင့် စာဖတ်ချင်စိတ် ဖြစ်သွားရင် အမြတ်ပါပဲ။ ဒါကြောင့် ကြွားပါ။ စာအုပ်အသစ်ဝယ်တိုင်းကြွားပါ။ အကြောင်းအရာ အသစ်တစ်ခု သိလာတိုင်း ကြွားပါ။ စာအုပ်ဖတ်ချင်အောင် သူများတွေလည်း သိချင်လာအောင် စိတ်ကို ဆွပေးပါ။ မြန်မာပြည်မှာ စာဖတ်တဲ့သူ အရမ်းနည်းပါတယ်။ ဒါကြောင့် သူများတွေ စာဖတ်ချင်လာအောင် ကြွားပါ။

ဒီလိုသာ ကိုယ်ပိုင် စာကြည့်တိုက်လေး တစ်ခုလောက် ဖြစ်လာပြီဆို အနည်းဆုံးတော့ ကိုယ်အကျိုးရှိပါတယ်။ ပြီးတော့ ကိုယ့်ပတ်ဝန်းကျင်လည်း အကျိုးရှိပါတယ်။ စာအုပ်ဝယ်တာ ဈေးကြီးနေရင်တောင် ငါသူများအကျိုး သယ်ပိုးနေတာပါလားဆိုတဲ့ အတ္တကလေးနဲ့ ဖြေသိမ့်နိုင်ပါသေးတယ်။ ကိုယ့်အတွက်လည်း စာအုပ်တွေ သပ်သပ်ရပ်ရပ် ဖြစ်သွားပါတယ်။ နောက်ပိုင်း ဒီလို စာအုပ်များတဲ့သူတွေ စုပေါင်းပြီးတော့ စာကြည့်တိုက် အလတ်စားလေး ပေါင်းပြီးတော့ ဖွင့်လာနိုင်ပါသေးတယ်။ ကျွန်တော်လည်း တစ်ချိန်မှာ ဖွင့်ချင်ပါသေးတယ်။